Leħen is-Sewwa: Editorial: L-attakki kontra l-Knisja [Diversi Artikli]

[Ara dan u aktar artikli relevanti li dehru fil-ħarġa tal-15 ta' Settembru 2012 hawn.]
15.9.12

Meta f’pajjiżna tinqala’ xi kwistjoni li dwarha l-Knisja thoss li għandha titkellem, mill-ewwel iqumu s-soltu opinjonisti li jattakkaw l-awtoritajiet tagħha u jsostnu li f’Malta mhux bħal pajjizi oħra. Iżda dawn li suppost isegwu l-aħbarijiet u l-ġrajjiet kurrenti jafu li mhux hekk qed jiġri fil-pajjizi l-ohra tad-dinja fejn fin-nofs ikun hemm kwistjonijiet fundamentali.

Hekk pereżenpju għadu kemm ġara fl-Italja fejn il-President tal-Konferenza Episkopali indirizza konferenza tal-aħbarijiet dwar deċizjoni tal-Qorti Ewropea dwar id-Drittijiet tal-Bniedem fuq l-IVF u, aktar qabel, fl-Iskozja, fejn l-Isqfijiet mhux talli ħarġu juru ċae u tond it-tagħlim tal-Knisja dwar l-omosesswali imma nki ħarġu ittra pastorali li nqrat fil-Knejjes Insara t’hemmhekk. Bħalissa fl-Iskozja għaddejja diskussjoni dwar liġi li qed tiġi proposta mill-Gvern biex l-omosesswali li jgħixu flimkien ikunu kkunsidrati bħala familja.

Iżda mhux hekk f’pajjiżna. Kull darba li l-Isqfijiet tagħna jitkellmu dwar kwistjoni fundamentali, kull darba li jkunu jridu jispjegaw lill-Insara t-tagħlim tal-Knisja, spiss, jekk mhux kull darba, jiġu akkużati flimkien mal-kleru, bħala nies ta’ moħħ magħluq.

Meta, mhux ukoll, ma jiġux akkużati b’omofobija. Hekk għadna kemm smajna u qrajna dwar il-pożizzjoni tal-Isqfijiet tagħna dwar il-liġi tal-IVF.

X’ma smajniex kontra l-Knisja, l-Isqfijiet u saċerdoti tul il-kampanja tar-referendum dwar id-divorzju?

X’aħna nisimghu dwar l-ittra Pastorali tal-Isqfijiet dwar il-Ħajja Umana?